Programming kya hai?

Yaha tak aane ke baad, ye title thoda ajeeb lagega 😅
Par ant tak bane rahiye!

Programming kya hai?

Sabko pata hai:
aagyakaari computer ko aagya dena!

Computer ki bhasha kya hai?

Computer sirf binary, yani 0 aur 1, samajhta hai.

Programming language kya hai? Aur itni saari kyun hain? 😭

Jese hum insaanon ki bhasha sirf sound hai, wese hi computer ki bhasha sirf electricity voltage level hai.

Higher voltage -> 1
Lower voltage -> 0

Ab hum sound ko likh nahi sakte, isliye humne script banayi hai. Kuch usi tarah, humne assembly language banayi hai!

Assembly bhasha machine bhasha ke bahut nazdeek hai, isliye mushkil hai:

; Linux x86-64 with NASM
section .data
    msg db "Hello, World!", 10
    len equ $ - msg

section .text
    global _start

_start:
    mov rax, 1          ; sys_write
    mov rdi, 1          ; stdout
    mov rsi, msg        ; message
    mov rdx, len        ; length
    syscall

    mov rax, 60         ; sys_exit
    xor rdi, rdi        ; exit code 0
    syscall

Tabhi humne high-level languages banayi hain, taaki program likhna aasaan ho.
Jese: C, C++, Rust, Go, Python, JavaScript, aadi.

Programming languages kitne tarah ke hote hain?

• Compiled (C,C++,Rust,Go)
• Interpreted (Python, Ruby)

Compiled yani hamara likha hua code, binary me badal kar ek file me save karte hain.
Wo file seedha hum chala sakte hain.

Jese, packed food items ki tarah, seedha kha sakte hain.

Interpreted matlab jab hum kahenge, tab us waqt interpreter hamare likhe code ko line by line badal kar chalayega.

Jese, garam-garam dosa hotel me banakar dete hain, aur hum wahi par khaate hain.

Hello World Program

To, hum kaha par the?

Go me Hello World Program:

package main

import "fmt"

func main(){
    fmt.Println("Pranaam 🙏🙏🙏🙏")
}

Humne ab tak seekha hai ki har Go program me ek main package hoga, jisme main function se hamara program shuru hoga.

Yaha par sirf ek line hai main function ke andar, jo "Pranaam 🙏🙏🙏🙏" ko print karegi.

fmt ek package hai jo Go ke saath aata hai, jismein Println() ek function hai, jiska kaam text ko terminal par print karna hai.

fmt package standard library ka hissa hai.

Kya hum bina library ke code likh sakte hain?

Jo students beginners hain, unmein kuch logon ko ye bhram hai ki agar hum bina kisi library ki madad ke saara code likhenge, tabhi hum programmer ya developer banenge.

Par ek udaharan ke saath is bhram ko door karte hain:

Hamare ghar ek baar ek carpenter uncle aaye the door lagane ke liye.
Wo sirf bana-banaya door lagate hain.
Door humein hi kisi dukaan se khareedna padta hai.

Lekin purane zamaane me carpenter khud ghar aakar wahin par lakdi kaat kar door banate the aur phir fit karte the.

Is zamaane me na hamare paas waqt hai, na paise, door banwa kar lagwane ke liye.

To jo uncle hamare ghar aaye the, wo bhi carpenter hain, aur jo shop me door banate hain, wo bhi carpenter hain.
Bas unka kaam alag hai.

Waise hi, Python me code likhne wale bhi programmer hain aur Python ki libraries likhne wale bhi programmer hain.

Jis domain me humein ruchi ho, usi me jaana chahiye!

Aaj ke liye bas itna hi 🫡

• Kavi: Ab waqt hai meri all-time favorite kavita ke liye!
  Sunna chahoge?

• Shrota: Bilkul!

• Kavi: Arz kiya hai,
  

हार को चुराने से चोर बनोगे

• Shrota: Thik hai thik hai, aage?
• Kavi:

और हार को हराने से वीर बनोगे

• Shrota: 🥶